THESHIELD Garkuwa
Related Articles
Daga Imrana Abdullahi
Shugaban Kwamitin rage radadin cire tallafin man fetur kuma Gwamnan Jihar Kebbi, Kwamared Dokta Nasir Idris ya tabbatar wa ‘yan Najeriya cewa ana ci gaba da kokarin dakile illolin cire tallafin man fetur.
Wata sanarwa da babban sakataren yada labaran gwamnan Ahmed Idris ya fitar, ta nuna cewa gwamnan ya bayyana hakan ne a gefen taron da sauran mambobin kwamitin (wasu gwamnoni hudu) suka gudanar a Abuja ranar Juma’a 14 ga watan Yuli. 2023.
Mambobin kwamitin sun hada da; Gwamna Bala Mohammed na Bauchi, Gwamna Charles Soludo na Anambra, Gwamna Uba Sani na Kaduna da Gwamna Hyacindu Alia na Benuwe, mambobin kungiyar kwadago, da kuma mambobin kungiyoyin farar hula.
Shugaban ya ba da tabbacin cewa nan ba da dadewa ba ‘yan Najeriya za su yi murmushi yayin da kwamitin ke yin iya bakin kokarinsa don kawo taimako da sassauta matsalolin da ake fuskanta.
Gwamna Idris ya ce: “Kwamitin ya yi bakin ciki tare da tattaunawa kan hanyoyin da za a bi don dakile illolin cire tallafin kuma nan ba da dadewa ba ‘yan Najeriya za su fara cin gajiyar hakan.
“Mun kuduri aniyar samar da kyakkyawan sakamako mai kyau da zai amfani ‘yan Najeriya, don haka a dage da tabbatar da cewa kwamitin na kan aikin.
“Abin da muke bukata shi ne hakuri, goyon baya da hadin kai daga dukkan ‘yan Najeriya don ba mu damar cimma burin da aka sanya a gaba da kuma manufofin kafa kwamitin da shugaban kasa Bola Ahmed Tinubu ya yi”.
