Mutane Su Rika Mika Korafi Ta Hanyar Da Ta Dace – Aliyu Waziri Dan marayan Zaki

Daga Imrana Abdullahi

Alhaji Dokta Aliyu Muhammad Waziri dan marayan Zaki kuma Santurakin Tudun Wada Kaduna ya yi kira ga daukacin al’ummar Najeriya da su rika mika korafinsu ta inda ya dace domin samun warakar matsalolin da ake korafin a kansu.

Dokta Aliyu Muhammad Waziri ya yi wannan kiran ne a cikin wata tattaunawa da ya yi na tsawon awa biyu da kafar Talbijin ta DITV Kaduna.

Dokta Waziri ya ci gaba da bayanin cewa shi a koda yaushe ya na yin kira ne ga jama’a idan za su mika korafinsu lallai su tabbatar sun mika shi a inda ya dace ta hanyar rubuta korafin a rubuce su mikawa dan majalisar da ke wakiltar su a matakin Jiha ko na tarayya.

“Idan abin da ya shafi Jiha ne su rika mika korafin ga shugaban karamar hukuma da dan majalisar Jiha domin ya Gabatarwa Gwamnatin jihar da suke. Idan kuma a matakin tarayya ne jama’a su rika mika korafinsu a rubuce ga dan majalisar tarayya ko Sanata kuma su shaida masa cewa za su kalli Talbijin domin ganin yadda zai gabatar da korafin na su a gaban majalisar kasa da nufin ayi masu maganin abin da ke daminsu”.

” Hakika akwai wahalar talauci da matsalar hau awards farashin kayan abinci da na masarufi a cikin al’umma kuma ya na idanunsu kwarai

Dan marayan Zaki ya kuma ce ayi hakuri tukunna domin lokacin bude shafin halin da Gwamnati ke ciki bai yi ba, amma da zarar Gwamnati ta yi watanni shida zuwa shekara daya to lokaci ya yi kuma za a yi wa jama’a cikakken bayani domin su fahimci abin da ake ciki.

Sai dai Aliyu Waziri Santurakin Tudun Wada Kaduna ya ce suna yi wa Gwamnatin tarayyar Najeriya karkashin jagorancin Bola Ahmad Tinibu kyakkyawan zato don haka kowa ya jira ya gani nan gaba.