Gwamna Matawalle Ya Nada Sabon Sarkin Kauran Namoda

Gwamnan Jihar Zamfara Bello Mohammed ( Matawallen Maradun) MON, ya tabbatar da nadin Alhaji Sanusi Mohammed a matsayin sabon Sarkin Kauran Namoda.

 Amincewa ta biyo bayan irin shawarar da majalisar zaben Sarki a masarautar Kauran Namoda ta bayar ne kamar yadda yake kunshe a cikin kundin tsarin dokokin masarautar.

Alhaji Sanusi Mohammed ya Gaji tsohon Sarkin ne Alhaji Mohammed Ahmed Asha wanda ya rasu bayan gajeruwar rashin lafiya.

Bayanin hakan na kunshe ne a cikin wata takardar da ke dauke da sa hannun Zailani Bappa, mai ba Gwamnan Zamfara shawara a kan harkokin wayar da kan jama’a da kuma kafafen yada labarai.

Kafin nadin nasa dan shekaru 40 Alhaji Sanusi Mohammed yana aiki da rundunar sojan Nijeriya ne a matsayin Mejo.

 Yayin da Gwamnan yake yin addu’ar Allah jikan mamacin wato tsohon sarki, Gwamna Matawalle ya kuma yi wa sabon Sarkin matan samun nasara a lokacin Mulkinsa.