THESHIELD Garkuwa
Related Articles
Daga, Sani Gazas Chinade, Maiduguri
Gwamnan jihar Borno, Farfesa Babagana Umara Zulum, ya kaddamar da wasu kwamitoci guda biyu, daya da zai kula da dawo da ‘yan gudun hijira daga kasashen makwabta da kuma kula da al’amuran tubabbun ‘yan tada kayar bayan Boko Haram.
Wani kwamitin kuma shi ne na bayar da damar sake tsugunar da ‘yan gudun hijira cikin aminci da mutunci zuwa garuruwan Gudumbali da Mairari, duk a karamar hukumar Guzamala da ke arewacin Borno.
Kwamitin mai mambobi 26 da ke kula da mayar da ‘yan gudun hijira da kuma tubabbun ‘yan tada kayar baya na karkashin jagorancin mataimakin gwamnan jihar Borno, Umar Usman Kadafur, tare da babban mai shari’a na jihar kuma kwamishinan shari’a, Bar. Kaka Shehu Lawan wadda shi ne zai kula da aikin kwacakwam kasancewar mataimakin gwamna ya tafi aikin Hajji.
Kwamitin yana da ‘yan majalisar tarayya, kwamishinoni, masu ba da shawara, wakilan hukumomin tsaro mazauna yankin, Majalisar Masarautar Borno, Hukumar Raya Arewa maso Gabas, da Hukumar Kula da ‘Yan Gudun Hijira ta kasa.
Har ila yau Kwamitin zai ba da damar ci gaba da maido da ‘yan gudun hijira sama da 200,000 galibi daga jihar Borno, wadanda suka yi gudun hijira zuwa yankunan kan iyaka a Jamhuriyar Nijar da Kamaru da Chadi tun a shekarar 2013 da 2014, sakamakon hare-haren Boko Haram.
Wannan kwamiti daga yanzu zai jagoranci daidaita matakan mayar da dubban mayakan Boko Haram da ISWAP da suka mika wuya da ke bukatar kwance damara don sake hadewa da al’ummomim su.
A bangaren kwamatin sake tsugunar da ‘yan gudun hijira da kuma tubabbun na Boko Haram a garuruwan Gudumbali da Mairari, Gwamna Zulum ya nada kwamishinan kananan hukumomi da masarautu Sugun Mai Mele wanda ya fito daga karamar hukumar Guzamala da abin ya shafa don kula da shi yayin da kwamishinan sake gine-gine, gyara da sake tsugunarwa, Engr. Mustapha Gubio, shine zai jagoranci shugaban tare da wasu mambobi 22.
Da yake jawabi ga kwamitocin, Zulum ya ce: “Za ku iya tunawa a watan Fabrairu ne shugaban kasa (Muhammadu Buhari) ya kafa wani kwamiti karkashin mataimakin shugaban kasa, kan maido da ‘yan Najeriya da suka yi hijira zuwa kasashen Chadi, Kamaru da Jamhuriyar Nijar. Nan ba da jimawa ba kwamitin zai ziyarci jihar Borno, don haka ya kamata mu samar da wasu gine-ginen mazauna da za su yi aiki tare da su don tabbatar da dawowar mutanenmu cikin sauri da nasara,” in ji Zulum.
Wani mamba a kwamitin Barista Kaka Shehu Lawan ya godewa Gwamna Zulum da ya sake ba su damar yi wa jihar hidima. Ya kuma tabbatar masa da jajircewarsu na cimma manufofin da aka sanya a gaba.
Har ila yau, mataimakin shugaban kwamitin sake tsugunar da matsugunan, Sugun Mai Mele ya yi alkawarin gudanar da aikin da aka sa su bil-hakki da gaskiya
