Na Gano Maganin Korona Bairus – Forofesa Ayodele 

Furodesa Ayodele ya bayyana hakan a wani taron manema labarai a kaduna inda ya sha alwashin cewa yana son Gwamnati ta bashi mutane biyar da zai yi wa maganin cutar Korona birus kyauta domin a tantance gaskiyar maganinsa.

Ya kuma shaidawa manema labarai cewa maganin da ya gano zai magance suk wata matsalar da ake fama da ita a kan wannan kwayar cuta ciki har da batun rufe jama’a cikin gidaje sakamakon hana su fita.

 Furofesa Ayodele Israel Adeleye wanda ya kasance a kan gaba wajen bincike da a kan kimiyyar fasahar Gwaje gwaje ya tabbatarwa da manema labarai cewa a shirye yake ya warkar da mutane biyar da ke da cutar Korona Bairus kyauta domin ya fayyace gaskiyar maganinsa da yake bayani a kansa saboda yan Nijeriya da duniya baki daya.

Furofesa Adeleye wanda ya kasance tsohon Malami ne a jami’ar Ahmadu Bello kuma tsohon ma’aikaci a Asibitin koyarwa na jami’ar Ahmadu Bello da ke Zariya, yana kira ga daukacin jami’an Gwamnati a dukkan mataki da kuma masu ruwa da tsaki a kan harkar lafiya da kada su yi kasa a Gwiwa wajen jaraba wannan maganin nasa domin amfanin al’umma, kasancewar cutar Covid – 19 da ake kira da Korona bairus na yin Illa ga ci gaban tattalin arzikin duniya baki daya.