An Nada Sale Musa Kwankwaso Hakimin Madobi

Mai martaba Sarkin Karaye Alhaji Dokta Ibrahim Abubakar III ya bayyana nadin Alhaji Sale Musa Kwankwaso da ake yi wa lakabi da (Baba) a matsayin Hakimin Madobi.

 Sabon Hakimin Madobin shi ne Dagacin Garin Kwankwaso kuma ya dade yana yi wa wannan gari na su hidima, wanda hakan ta sa cancantarsa a matsayin magajin mahaifin sa.

Dimbin jama’a dai sun bayyana wannan sabon nadin sarauta a matsayin karamcin da aka yi wa gidan marigayi Mahaifin tsohon Gwamnan Jihar Kano Dokta Rabi’u Musa Kwankwaso.

Za’ a mika wa Gwamna Ganduje a rubuce wannan sabon nadi domin sahalewarsa. Muna taya sabon Makaman Karaye kuma Hakimin Madobi murnar wannan sabon matsayi.