Barazanar Kwankwaso; Farfesa Usman Yusuf Ya Koka Game Da Rayuwarsa

A cikin wata SANARWAR MANEMA LABARU da aka fitar a ranar  22 ga Mayu, 2026  Farfesa Usman Yusuf Ya Shigar Da Ƙorafi Ga Hukumomin Tsaro Kan  Barazana Da Kalaman tayar Da Hankali Da Sanata Rabi’u Musa Kwankwaso Ya Yi a Kansa

Tsohon Babban Sakataren Hukumar Inshorar Lafiya ta Ƙasa (NHIS), Farfesa Usman Yusuf, ya miƙa ƙorafi a hukumance ga Rundunar ’Yan Sandan Najeriya da Hukumar Tsaro ta Farin Kaya (DSS) kan abin da ya bayyana a matsayin kalamai na barazana da tayar da hankali da Sanata Rabi’u Musa Kwankwaso ya yi a kansa.  A cikin ƙorafin da aka aika wa Sufeto Janar na ’Yan Sanda da Darakta Janar na DSS, Farfesa Yusuf ya bayyana damuwarsa kan kalaman da Sanata Kwankwaso ya yi a wani jawabi da ya bazu sosai, bayan sharhin da Farfesa Yusuf ya yi a kafafen yaɗa labarai kan haɗakar siyasa da batutuwan siyasar Ƙasa.

A cewar Farfesa Yusuf, duk da cewa Sanata Kwankwaso bai ambaci sunansa kai tsaye ba, bayanin da ya yi a jawabin ya isa ya sa masu kallo da magoya baya da suka san batun suka fahimci cewa shi ake nufi.  Farfesa Yusuf ya ƙara da cewa Sanata Kwankwaso ya kira ga mambobin ƙungiyar Kwankwasiyya da wasu matasan siyasa masu alaƙa da ita da su “tarwatsa” mutumin da yake magana a kansa ta amfani da kalmar Hausa “pata-pata,” wadda yake ganin za a iya fassara ta a matsayin kira ga tsoratarwa ko tashin hankali ko yimashi lahani daga magoya baya.

Ya ce, idan aka yi la’akari da yanayin siyasar da ake ciki da kuma tarihin tashin hankalin siyasa a wasu sassan ƙasar nan, bai kamata a ɗauki irin waɗannan kalamai da wasa ba.  “Ina kallon waɗannan kalamai a matsayin masu haɗari, masu tayar da hankali, kuma masu iya jefa rayuwata da rayuwar iyalina cikin haɗari,” in ji Farfesa Yusuf a cikin ƙorafin.

 Ƙorafin ya buƙaci hukumomin tsaro su rubuta korafin a hukumance, su gayyaci Sanata Kwankwaso domin amsa tambayoyi, sannan su ɗauki matakan kariya domin hana duk wata barazana ga Farfesa Yusuf ko waɗanda ke tare da shi.

Farfesa Yusuf ya jaddada cewa dole ne al’ummomin dimokuraɗiyya su kare ’yancin ’yan ƙasa na bayyana ra’ayoyinsu da shiga tattaunawar ƙasa ba tare da tsoro, barazana, ko hare-haren siyasa ba.

  Haka kuma ya yi kira ga shugabannin siyasa daga dukkan jam’iyyu da su yi taka-tsantsan wajen furuci a bainar jama’a, tare da kaucewa kalaman da za su iya tunzura magoya baya ko kawo cikas ga zaman lafiya.

An kuma aika kwafen ƙorafin zuwa Ofishin Mai Bai Wa Shugaban Ƙasa Shawara Kan Tsaro (NSA), Hukumar Kare Haƙƙin Dan Adam ta Ƙasa (NHRC), Ofishin Jakadancin Amurka da ke Abuja, da Ofishin Jakadancin Tarayyar Turai a Najeriya.

Sa hannu