IMRANA ABDULLAHI DAGA KADUNA
Ibrahim Musa Gusau, ne sabon shugaban hukumar kwallon kafa a tarayyar Najeriya, tun bayan da aka nada shi al’ Umma ke ci gaba da bayyana goyon bayansu.
Dokta Suleiman Shu’aibu Shinkafi, sarkin Shanun Shinkafi na farko ya bayyana cewa suna da yakinin samun sauyi a lokacin da zai kasance shugaban hukumar.
“Duk abin da kuka Sani na alkairi zai shigo Jihar Zamfara domin na san zai yi amfani da wannan damar yaga cewa ya taimakawa matasan Jihar Zamfara ta hanyar turasu wurare da dama da za su ta fi suyi wasanni, kuma zai yi kokarin kawo mana hanyoyin bunkasa wuraren wasanni mu sa kuma kirkiro wadansu Sabbi domin ci gaban harkar wasanni a Jihar Zamfara da kasa baki daya”.
Ya kara da cewa hakika muna murna da farin cikin yadda aka samu dan Jihar Zamfara na wannan shugabanci na hukumar wasanni a Najeriya
Da yake tofa albarkacin bakinsa Ahmad Muhammad Bagu cewa ya yi ya na da yakinin lallai sabon shugaban hukumar kwallon kafar zai samar da ci gaban da ba a taba samu ba a Najeriya kuma idan hakan ta samu hakar jihar Zamfara ta cimma ruwa.
Sai dai al’umma musamman masana harkokin wasanni kwallon kafa da suka hada da marubuta labarin wasannin sun ce akwai wadansu kalubale a gaban sabon Shugaba Ibrahim Gusau, da suka hada da samar da katafaren filin wasan kwallon kafa na zamani da kuma samun babbar kungiyar kwallon kafa da za ta yi kafada da kafada da sauran kungiyoyin na kasa da duniya baki daya.
Kuma kasancewarsa kwararre a harkar wasan kwallon kafa da ya dade a hukumar tare da rike mukamai ana saran zai magance dimbin kalubalen da ke gabansa har a samu nasarar da kowa zai yi sambarka
THESHIELD Garkuwa
