Ina Nan Kan Takarata – Shettima Usman Yerima

Dan takarar neman kujerar dan majalisar dattawa daga yankin mazabar Kaduna ta tsakiya Kwamared Yerima Usman Shettima, ya bayyana cewa ya na Nan a kan matsayinsa na dan takarar majalisar dattawa ba gudu ba ja da baya.

Shettima Usman Yerima ya bayyana hakan ne a wajen wani babban taron manema labaran da ya kira a ofishinsa da ke Kaduna.

Yerima, ya ci gaba da cewa shi a matsayinsa na dan takara karkashin jam’iyyar APC babu wanda ya tuntube shi a game da wata maganar wai an tsayar da wani dan takarar kujerar majalisar dattawa daga yankin Kaduna ta tsakiya, don haka ina don shaidawa jama’a cewa ina Nan a kan matsayin dan takara ba ko wani kokwanto ko na minti ɗaya, takara kawai.

” Kamar yadda kowa ya sani duk inda za a yi wani batun yin Sasanci a harkar siyasa lallai sai an yi zama da dukkan bangarorin da abin ya shafa, sannan kamar Ni a matsayin dan takara zan je in zauna tare da mutane na mu tattauna, amma babu inda hakan ya faru don haka ina nan zan sayi fom din tsayawa takara a kuma shiga filin zabe a fafata idan Allah ya ba mu nasara a ci gaba da fafutukar samun nasarar babban zabe.

“A matsayinsa na dan takarar da ke a kan gaba a yankin Kaduna ta tsakiya ta yaya za a ce irin hakan za ta faru ba tare da wata tattaunawa a tsakanin mu ba yan takara”.

Kamar yadda Shettima Yerima yake fadin cewa ya na yin wannan takara ne domin jama’a ba wai domin kansa kawai ba a matsayinsa na dan gwagwarmayar kwato yancin jama’a da ya dade ana fafatawa da shi tun dadewa.

” Shugaba Bola Ahmed Tinubu da Gwamna Sanata Uba Sani ai duk tun muna kananan yan Gwagwarmaya muna tare da su baki daya mun dade muna fafatawa domin kwato yancin jama’a.

“Ina son fadakar da jama’a cewa lallai ya dace su san cewa ina Nan a cikin takara kuma ba a yi wata magana da Ni ba kai ko ma wata magana mai kama da hakan ba a yi da Ni ba”.

“Don haka a tsarin dimokuraɗiyyar babu batun a je wani wuri a tsara sunan masu takara haka kawai, saboda haka muke shaidawa jama’a cewa shugaba Bola Ahmed Tinubu ma Dan fafutukar tabbatar da dimokuraɗiyyar ne don haka ina saran ba zai amince da wani batun an tsayar da wane ko wane ba tare da an bi tsarin tanadin dimokuradiyyar ba.

Kuma a game da ” batun magoya baya na ina gaya masu cewa ina jiran a fitar da sayar da fom ne domin yan takara su saya Sannan kuma ina jiran ranar da za a je filin zaben fitar da dan takarar da zai tsayawa jam’iyyar APC matsayin dan takarar majalisar dattawa a yankin Kaduna ta tsakiya”.

“Za mu iya kawo shugaban kasa Gwamna da kuma kan mu, wato kujerar majalisar dattawa baki daya a jihar Kaduna, kasancewar mu na wadanda muka yi fafutukar neman jama’a kuma har yau muna tare da jama’a a ko’ina”.

Ina kuma yin kira ga jama’a masoya da magoya baya na cewa kada su amince da duk wani bayanin da suke ji ko gani a wani wuri da ba daga wurin ku suka fito ba.